Святой иоанн воин

12 августа — день памяти мученика Иоанна Воина

Свя­той му­че­ник Иоанн Воин слу­жил в им­пе­ра­тор­ском вой­ске Юли­а­на Отступ­ни­ка (361–363). Наря­ду с дру­ги­ми во­и­на­ми его по­сы­ла­ли пре­сле­до­вать и уби­вать хри­сти­ан. Оста­ва­ясь внешне го­ни­те­лем, свя­той Иоанн на деле ока­зы­вал го­ни­мым хри­сти­а­нам боль­шую по­мощь: тех, ко­то­рые были схва­че­ны, осво­бож­дал, дру­гих пре­ду­пре­ждал о гро­зя­щей им опас­но­сти, со­дей­ство­вал их по­бе­гу.

Свя­той му­че­ник Иоанн Воин

Свя­той Иоанн ока­зы­вал ми­ло­сер­дие не толь­ко хри­сти­а­нам, но и всем бед­ству­ю­щим и тре­бу­ю­щим по­мо­щи: по­се­щал боль­ных, уте­шал скор­бя­щих. Когда Юли­ан Отступ­ник узнал о дей­стви­ях свя­то­го, то за­клю­чил его в тем­ни­цу. В 363 году им­пе­ра­тор был убит на войне с пер­са­ми. Свя­той Иоанн вы­шел на сво­бо­ду и по­свя­тил свою жизнь слу­же­нию ближ­ним, жил в свя­то­сти и чи­сто­те. Скон­чал­ся он в глу­бо­кой ста­ро­сти.

Год кон­чи­ны его точ­но не из­ве­стен, ме­сто по­гре­бе­ния свя­то­го Иоан­на Вои­на по­сте­пен­но было за­бы­то. Он явил­ся од­ной бла­го­че­сти­вой жен­щине и ука­зал ме­сто сво­е­го упо­ко­е­ния. Оно ста­ло из­вест­но в этом окру­ге. Обре­тен­ные его мощи были по­ло­же­ны в церк­ви апо­сто­ла Иоан­на Бого­сло­ва в Кон­стан­ти­но­по­ле. Гос­подь да­ро­вал свя­тым мо­щам Иоан­на Вои­на бла­го­дат­ную силу ис­це­ле­ния. По мо­лит­вам свя­то­го Иоан­на по­лу­ча­ют уте­ше­ние оби­жен­ные и скор­бя­щие. В Православной Церк­ви Иоанн Воин свя­то чтит­ся как ве­ли­кий по­мощ­ник в скор­бях и в раз­лич­ных жи­тей­ских об­сто­я­ни­ях.

Православный Церковный календарь

Кондак 1

Избра́ннаго раба́ Царя́ Небе́снаго, до́бляго Христо́ва страстоте́рпца, Иоа́нна свята́го Во́ина и чудотво́рца похва́льными пе́сньми воспои́м, я́ко христиа́н засту́пника, целому́дрия блюсти́теля, стра́ждущих уте́шителя. Ты же, предстоя́ Престо́лу Святы́я Тро́ицы, моли́твами свои́ми от вся́ких зол и напа́стей охраня́й с ве́рою и любо́вию зову́щих ти:

Ра́дуйся, Иоа́нне, святы́й Во́ине и пресла́вный чудотво́рче.

Икос 1

Арха́нгели и А́нгели с любо́вию зря́ху на равноа́нгельское житие́ твое́, Иоа́нне пречу́дне, ты бо, пеки́йся о Госпо́дних, ка́ко угоди́ти Го́сподеви, сохрани́л де́вство неврежде́нно, посто́м и моли́твою умерщвля́я плоть свою́ день и нощь. Мы же таково́му житию́ твоему́ дивя́щеся, со умиле́нием взыва́ем ти си́це:

Ра́дуйся, чистоту́ се́рдца своего́ сохрани́вый; ра́дуйся, я́ко сего́ ра́ди Бо́га узре́ти сподо́бился еси́.

Ра́дуйся, и́го Христо́во на ра́мо свое́ взе́мший; ра́дуйся, ду́шу свою́ Христа́ ра́ди погуби́вый, во е́же спасти́ ю.

Ра́дуйся, А́нгелов сожи́телю; ра́дуйся, де́вственников похвало́.

Ра́дуйся, храни́телю и наста́вниче ю́ных отроко́в; ра́дуйся, ско́рый помо́щниче борю́щимся со страстьми́ и похотьми́.

Ра́дуйся, защи́тниче дев и вдови́ц; ра́дуйся, обличе́ние наруши́телей целому́дрия.

Ра́дуйся, роди́телей и воспита́телей наста́вниче; ра́дуйся, сиро́тствующих незри́мый води́телю.

Ра́дуйся, Иоа́нне, святы́й Во́ине и пресла́вный чудотво́рче.

Кондак 2

Ви́дя святы́й Иоа́нн, егда́ прии́де в Ну́меры Ифа́льския, христиа́ны гони́мы, не убоя́ся преще́ний нечести́ваго Иулиа́на и рече́ им: мужа́йтеся, укрепля́йтеся в ве́ре, да сподо́битеся вы́ну воспева́ти в Небе́сных черто́зех Христу́ Бо́гу: Аллилу́иа.

Икос 2

Ра́зум несумне́нный име́л еси́ в себе́, Иоа́нне достохва́льне, егда́ сла́ву ми́ра сего́ презре́в и гне́ва ца́рскаго не устраши́вся, испове́дал себе́ христиа́нина бы́ти, и сего́ ра́ди, я́ко злоде́й, в темни́цу всажде́н был еси́. Таково́му твоему́ о Христе́ дерзнове́нию дивя́щеся, глаго́лем:

Ра́дуйся, испове́дниче Христо́в преизря́дный; ра́дуйся, Христу́ спострада́вый.

Ра́дуйся, и́дольскаго служе́ния пре́лесть обличи́вый; ра́дуйся, си́лою Креста́ врага́ победи́вый.

Ра́дуйся, я́ко у́зы и темни́цу за Христа́ прия́ти сподо́бился еси́; ра́дуйся, я́ко хлад и наготу́ за Христа́ предпоче́л еси́ сла́ве грехо́вней.

Ра́дуйся, испове́дников похвало́; ра́дуйся, му́чеников ра́дование.

Ра́дуйся, в земны́х во́инех до́блий во́ин Царя́ Небе́снаго; ра́дуйся, убели́вый ри́зы своя́ в Кро́ви А́гнчей.

Ра́дуйся, Це́ркве Христо́вы защи́тниче; ра́дуйся, всех правосла́вных засту́пниче.

Ра́дуйся, Иоа́нне, святы́й Во́ине и пресла́вный чудотво́рче.

Кондак 3

Си́лою свы́ше препоя́санный возмо́гл еси́ победи́ти дре́вняго зми́я; то́южде си́лою одаре́нный, источа́еши оби́лие чуде́с всем призыва́ющим с ве́рою и́мя твое́ и о тебе́ благода́рне вопию́щим Бо́гу: Аллилу́иа.

Икос 3

Име́я в се́рдце свое́м тве́рдую ве́ру во Христа́ и си́лою тоя́ вооружи́вся, не убоя́лся еси́ гне́ва царе́ва и сохраня́л еси́ ифа́льския лю́ди от мучи́телей. Сего́ ра́ди таково́е му́жество твое́ похваля́юще, блажи́м тя си́це:

Ра́дуйся, адама́нте ве́ры Христо́вы; ра́дуйся, сто́лпе Це́ркве Бо́жия.

Ра́дуйся, ве́рных наде́ждо и заступле́ние; ра́дуйся, неве́рных страх и посрамле́ние.

Ра́дуйся, вене́ц испове́дника Христо́ва стяжа́вый; ра́дуйся, ору́жием Креста́ врага́ Христо́ва низложи́вый.

Ра́дуйся, Христа́ па́че ми́ра возлюби́вый; ра́дуйся, за христиа́ны ду́шу свою́ положи́вый.

Ра́дуйся, за́мыслы богоме́рзкаго мучи́теля разсе́явый; ра́дуйся, я́ко в темни́цех су́щих и во у́зех посеща́л еси́.

Ра́дуйся, я́ко и сам за Христа́ в темни́цу всажде́н был еси́; ра́дуйся, я́звы Го́спода своего́ на те́ле носи́вый.

Ра́дуйся, Иоа́нне, святы́й Во́ине и пресла́вный чудотво́рче.

Кондак 4

Бу́рею помышле́ний сумни́тельных колеба́шеся блаже́нный Иоа́нн, егда́ по́слан бысть в Ну́меры Ифа́льския, да му́чит та́мо ве́рующия во Христа́. «А́ще у́бо, — глаго́лаше, — по повеле́нию царе́ву и́мам благове́рныя лю́ди му́чити и убива́ти, осужде́н бу́ду от Бо́га, а́ще же не иду́ та́мо, в чи́не во́инства моего́ обря́щуся царю́ проти́вен и преда́н бу́ду сме́рти лю́тей». Оба́че стра́хом Бо́жиим води́мый, ве́ру Христо́ву в се́рдце свое́м сохрани́л да́же до злострада́ний и уз темни́чных, вопия́ Христу́: Аллилу́иа.

Икос 4

Слы́шав нечести́вый Иулиа́н твое́ ко христиа́ном милосе́рдие и уве́дев тя самаго́ христиа́нина бы́ти, разъяри́ся на тя зло́бою и повеле́ привести́ в Царьгра́д, я́ко злоде́я и проти́вника царе́ва. Ты же, благода́тию Бо́жиею укрепля́емь, страда́ния претерпе́л еси́ му́жественно и от ве́ры во Христа́ ника́коже отступи́л еси́. Сего́ ра́ди велича́ем тя си́це:

Ра́дуйся, испове́дниче ве́ры во Христа́ неустраши́мый; ра́дуйся, во́ине Христо́в непобеди́мый.

Ра́дуйся, я́ко со Архистрати́гами Сил Небе́сных Престо́лу Бо́жию предстои́ши; ра́дуйся, ско́рый помо́щниче всем за и́стину терпя́щим.

Ра́дуйся, искуше́ний и собла́знов от диа́вола избе́гнувый; ра́дуйся, я́ко и всех призыва́ющих тя от искуше́ний избавля́еши.

Ра́дуйся, за́мыслы богоме́рзкаго мучи́теля разсе́явый; ра́дуйся, и нам се́ти диа́вола избега́ти помога́ющий.

Ра́дуйся, щито́м ве́ры себя́ самаго́ от стрел лука́ваго защити́вый; ра́дуйся, и́мже и нас от искуше́ний охраня́ющий.

Ра́дуйся, христиа́нскаго ро́да украше́ние; ра́дуйся, Небе́сных черто́гов обита́телю.

Ра́дуйся, Иоа́нне, святы́й Во́ине и пресла́вный чудотво́рче.

Кондак 5

Боготе́чней звезде́ подо́бен был еси́, Иоа́нне, егда́, прише́д в страны́ Ифа́льския, увеща́л еси́ та́мо су́щих христиа́н не отступа́ти от Со́лнца Пра́вды Христа́ Бо́га, но вы́ну пе́ти Ему́: Аллилу́иа.

Икос 5

Ви́дя святы́й приводи́мыя пред него́ по повеле́нию царе́ву ве́рныя Христу́ лю́ди на муче́ние за ве́ру Христо́ву, зело́ скорбе́ за них, в се́рдце свое́м пеки́йся, да изба́вит их от руки́ мучи́телевы. Таково́е твое́ попече́ние о них похваля́юще, зове́м ти:

Ра́дуйся, любо́вь Христо́ву в се́рдце свое́м име́вый; ра́дуйся, я́ко то́ю согрева́емь от мучи́телей ве́рныя рабы́ Христо́вы спаса́л еси́.

Ра́дуйся, веле́ния нечести́вых презре́вый; ра́дуйся, за́поведи Христо́вы сохрани́вый.

Ра́дуйся, ве́рных рабо́в Христо́вых дру́же; ра́дуйся, христиа́н засту́пниче.

Ра́дуйся, су́щим в темни́цех и во у́зех уте́шителю; ра́дуйся, ни́щих корми́телю.

Ра́дуйся, стра́нных води́телю; ра́дуйся, немощству́ющих врачу́.

Ра́дуйся, засту́пниче си́рых; ра́дуйся, пла́чущих уте́шителю.

Ра́дуйся, Иоа́нне, святы́й Во́ине и пресла́вный чудотво́рче.

Кондак 6

Посто́м и моли́твою плоть твою́ ду́хови порабо́тил еси́ и во сла́ву Бо́жию духо́вне пожи́л еси́; сего́ ра́ди ны́не предстои́ши Престо́лу Пресвяты́я Тро́ицы, вы́ну воспева́я песнь: Аллилу́иа.

Икос 6

Возсия́л еси́, я́ко но́вое свети́ло на тве́рди небе́сней, всему́ христиа́нскому ро́ду, егда́ Бо́жиим изволе́нием обре́тено бысть нетле́нное те́ло твое́, источа́ющее оби́лие чуде́с с ве́рою к твоему́ заступле́нию притека́ющим и моли́твенно тебе́ взыва́ющим:

Ра́дуйся, Бо́гу житие́м твои́м угоди́вый; ра́дуйся, сего́ ра́ди от Него́ прославле́ние прия́вый.

Ра́дуйся, тщету́ и пре́лесть ми́ра сего́ презре́вый; ра́дуйся, мзду Небе́сную восприя́вый.

Ра́дуйся, я́ко о ма́ле ве́рен яви́лся еси́; ра́дуйся, я́ко оби́лие благода́ти Бо́жией прия́ти сподо́бился еси́.

Ра́дуйся, я́ко в житии́ сем бли́жняго самоотве́рженно возлюби́л еси́; ра́дуйся, я́ко в ско́рбех и напа́стех су́щим засту́пник был еси́.

Ра́дуйся, ду́шу свою́ за дру́ги полага́вый; ра́дуйся, те́плый хода́таю за нас у Царя́ Небе́снаго.

Ра́дуйся, от мучи́телева гне́ва христиа́ны спаса́вый; ра́дуйся, я́ко и днесь о спасе́нии на́шем пече́шися.

Ра́дуйся, Иоа́нне, святы́й Во́ине и пресла́вный чудотво́рче.

Кондак 7

Хотя́щу ти от ми́ра сего́ пресели́тися, смиренному́дрием побужда́ем, повеле́л еси́ не́коему челове́ку те́ло твое́ положи́ти в до́ме, иде́же стра́ннии и ни́щии погреба́хуся. Госпо́дь же, смире́нныя вознося́й, благоволи́ сохрани́ти о́ное нетле́нно и чудотворе́ния источа́ющее всем ко твоему́ заступлению с ве́рою притека́ющим и о тебе́ Бо́гу вопию́щим: Аллилу́иа.

Икос 7

Но́вую показа́ ми́лость рабо́м Свои́м Человеколю́бец Госпо́дь, егда́ благоволи́ просла́вити тя и яви́ти в тебе́ благода́ть Свою́ чудотворя́щу. Мы же таково́му промышле́нию Бо́жию ра́дующеся, благода́рне вопие́м:

Ра́дуйся, вмести́лище благода́ти Бо́жией; ра́дуйся, сосу́де Бо́жий избра́нный.

Ра́дуйся, чудотво́рче преди́вный; ра́дуйся, притека́ющим к тебе́ с ве́рою ско́рую по́мощь подава́яй.

Ра́дуйся, душе́вных и теле́сных неду́гов на́ших цели́телю; ра́дуйся, бесо́в о и́мени Христо́ве изгони́телю.

Ра́дуйся, лука́вство врага́ челове́ческаго обличи́телю; ра́дуйся, целому́дрия охрани́телю.

Ра́дуйся, благочести́вых супру́жеств от вся́каго диа́вольскаго прельще́ния незри́мая огра́до; ра́дуйся, татьбы́ и граби́тельства ско́рый обличи́телю.

Ра́дуйся, соврати́вшихся на путь и́стины наста́вителю; ра́дуйся, проше́ния на́ша на по́льзу исполня́яй.

Ра́дуйся, Иоа́нне, святы́й Во́ине и пресла́вный чудотво́рче.

Кондак 8

Стра́нное и ди́вное явле́ние твое́ чрез со́нное виде́ние не́коей жене́ благогове́йней уве́девшей и но́ваго чудотво́рца и уго́дника Бо́жия в тебе́ позна́вшей, лю́дие константино́польстии умили́шася и возопи́ша Бо́гу: Аллилу́иа.

Икос 8

Весь доброде́тельми испо́лненный в жи́зни сей, по сме́рти же сла́вою Бо́жиею озаре́нный, преклоня́еши у́хо твое́ на моли́твы чту́щих тя, от ни́хже слы́шиши сицева́я:

Ра́дуйся, милосе́рдию Отца́ Небе́снаго подража́телю; ра́дуйся, а́лчущих пита́телю.

Ра́дуйся, стра́нных неви́димый сопу́тниче; ра́дуйся, си́рых покрови́телю.

Ра́дуйся, озлобля́емых уте́шителю; ра́дуйся, за и́стину терпя́щих подкрепи́телю.

Ра́дуйся, неду́гующим осла́бу и исцеле́ние подава́яй; ра́дуйся, в беда́х су́щих засту́пниче.

Ра́дуйся, ни́щия возлюби́вый; ра́дуйся, я́ко с ни́ми и по отше́ствии от ми́ра сего́ те́лом разлучи́тися не восхоте́л еси́.

Ра́дуйся, я́ко в до́ме убо́гих погребсти́ те́ло свое́ завеща́л еси́; ра́дуйся, за смиренному́дрие твое́ венце́м от Бо́га увенча́нный.

Ра́дуйся, Иоа́нне, святы́й Во́ине и пресла́вный чудотво́рче.

Кондак 9

Все во́инство а́нгельское возра́довашеся, ви́дя тя, во́ина Царя́ Небе́снаго непреобори́ма, победи́вша миродержи́теля тьмы и пре́лести ве́ка сего́, те́мже и воспе́ Бо́гу: Аллилу́иа.

Икос 9

Вити́и многовеща́ннии не возмо́гут по достоя́нию восхвали́ти страда́ния твоя́, за Христа́ претерпе́нныя, и милосе́рдия и целому́дрия твоего́ по́двиги. Мы же таковы́м дивя́щеся, в не́мощи на́шей ма́лыя сия́ хвале́ния прино́сим тебе́:

Ра́дуйся, Христа́ всем се́рдцем возлюби́вый; ра́дуйся, во́льная страда́ния за И́мя Его́ претерпе́вый.

Ра́дуйся, о Бо́зе Вседержи́теле поревнова́вый; ра́дуйся, вене́ц му́ченический стяжа́вый.

Ра́дуйся, пра́вило ве́ры и воздержа́ния учи́телю; ра́дуйся, нищету́ духо́вную прояви́вый.

Ра́дуйся, смиренному́дрием твои́м ду́ха горды́ни низложи́вый; ра́дуйся, насле́дие Ца́рства Небе́снаго стяжа́вый.

Ра́дуйся, в дому́ Отца́ Небе́снаго оби́тель себе́ сотвори́вый; ра́дуйся, я́ко о спасе́нии на́шем при́сно хода́тайствуеши.

Ра́дуйся, по́мощь ско́рую прося́щим подава́яй; ра́дуйся, я́ко немо́лчно мо́лиши за ны Христа́ Бо́га.

Ра́дуйся, Иоа́нне, святы́й Во́ине и пресла́вный чудотво́рче.

Кондак 10

Спасти́ хотя́ ду́шу свою́, презре́л еси́ веле́ния мучи́теля, и о те́ле свое́м неради́в, ра́достно восприя́л еси́ у́зы желе́зныя и темни́чную скорбь, Иоа́нне, Христо́в Во́ине, воспева́я укрепля́вшему тя Бо́гу: Аллилу́иа.

Икос 10

Стена́ еси́ и тве́рдое прибе́жище всем с моли́твою к тебе́ прибега́ющим, чудотво́рче Иоа́нне, сего́ ра́ди зове́м ти:

Ра́дуйся, ско́рый послу́шниче всех призыва́ющих тя; ра́дуйся, я́ко честны́я мо́щи твоя́ благоволи́ Бог просла́вити чудесы́.

Ра́дуйся, я́ко и от ико́н твои́х подае́тся благода́ть Бо́жия взира́ющим на них с ве́рою; ра́дуйся, я́ко в созда́нных на прославле́ние и́мене твоего́ хра́мех незри́мо обита́еши.

Ра́дуйся, я́ко никто́же та́мо с ве́рою моля́щийся тощ и неуслы́шан исхо́дит; ра́дуйся, я́ко моли́твами твои́ми подкрепля́еши на́ша моле́ния, ко Престо́лу Вседержи́теля восходя́щия.

Ра́дуйся, я́ко коего́ждо проше́ния предвари́ти тщи́шися; ра́дуйся, я́ко на стро́потнем пути́ греха́ иду́щим вразумле́ния подае́ши.

Ра́дуйся, я́ко искуша́емым от диа́вола ско́рую по́мощь явля́еши; ра́дуйся, я́ко всех идти́ на путь спасе́ния направля́еши.

Ра́дуйся, я́ко гре́шныя на покая́ние наставля́еши; ра́дуйся, уго́дниче Христо́в и моли́твенниче о нас благоприя́тный.

Ра́дуйся, Иоа́нне, святы́й Во́ине и пресла́вный чудотво́рче.

Кондак 11

Пе́ние похва́льное прино́сим тебе́, му́чениче Христо́в Иоа́нне, е́же с любо́вию прие́мля, моли́ Го́спода избавитися нам от бед и скорбе́й, наипа́че же в час кончи́ны на́шея твои́м заступле́нием предвари́, да не у́мрем безпокая́нны, но сподо́бимся в Небе́сных селе́ниих с тобо́ю воспе́ти Бо́гу: Аллилу́иа.

Икос 11

Свеща́ еси́ в це́ркви Христо́вей, горя́щи невеще́ственным све́том благода́ти Бо́жией и озаря́ющи тьму неразу́мия на́шего, Иоа́нне преблаже́нне. Сего́ ра́ди мо́лим ти ся: просвети́ ны, омраче́нныя грехо́м, да воспои́м тебе́:

Ра́дуйся, свет Боже́ственнаго уче́ния в се́рдце свое́м носи́вый; ра́дуйся, я́ко тем просвеща́емь, тьму и́дольскаго служе́ния обличи́л еси́.

Ра́дуйся, я́ко и нам те́мже све́том просвети́тися тщи́шися; ра́дуйся, я́ко сла́ву Трисия́ннаго Божества́ лице́м к Лицу́ зри́ши.

Ра́дуйся, лучу́ благода́ти Бо́жией, от Со́лнца Пра́вды возжже́нный; ра́дуйся, озаря́яй тьму неве́дения на́шего све́том Христо́вых за́поведей.

Ра́дуйся, путево́дная звезда́ всем и́щущим спасе́ния; ра́дуйся, я́ко наставля́еши нас на вся́кое де́ло благо́е.

Ра́дуйся, я́ко мысль бла́гу нам на се́рдце во благовре́мении полага́еши; ра́дуйся, я́ко во́инскому зва́нию о́браз до́браго во́ина в себе́ показу́еши.

Ра́дуйся, озари́вый вселе́нную све́том доброде́телей твои́х; ра́дуйся, я́ко, ви́дя до́брая де́ла твоя́, челове́цы Отца́ Небе́снаго прославля́ют.

Ра́дуйся, Иоа́нне, святы́й Во́ине и пресла́вный чудотво́рче.

Кондак 12

Благода́ть дана́ тебе́ от Бо́га во е́же руково́дствовати ко спасе́нию и сохраня́ти от бед чту́щих па́мять твою́, сего́ ра́ди моли́твами твои́ми огради́ от вся́каго зла Це́рковь и страну́ Росси́йскую, ве́рныя же вся в доброде́телех преуспева́ти сотвори́, да воспои́м вси Бо́гу: Аллилу́иа.

Икос 12

Пою́ще Бо́га, ди́внаго во святы́х Свои́х, хва́лим тя, Христо́ва испове́дника, во́ина же и чудотво́рца хвале́ньми сицевы́ми:

Ра́дуйся, Це́ркве Бо́жия украше́ние; ра́дуйся, к во́инству Небе́сному сопричте́нный.

Ра́дуйся, всеору́жие Бо́жие прие́мый; ра́дуйся, тем вся ко́зни вра́жия преодоле́вый.

Ра́дуйся, броне́ю пра́ведности облече́нный; ра́дуйся, щито́м ве́ры осене́нный.

Ра́дуйся, шлем спасе́ния стяжа́вый; ра́дуйся, меч духо́вный, е́же есть сло́во Бо́жие, па́че вся́каго ору́жия возлюби́вый.

Ра́дуйся, препоя́санный от Бо́га пра́вдою и и́стиною о чре́слех свои́х; ра́дуйся, я́ко к зва́нным на бра́чную ве́черю А́гнца сопричте́н еси́.

Ра́дуйся, я́ко та́мо воспе́ти песнь но́ву пред Престо́лом Его́ сподо́бился еси́; ра́дуйся, на Не́бе приобща́яйся ны́не Христа́ и́стее, не́же иногда́ на земли́.

Ра́дуйся, Иоа́нне, святы́й Во́ине и пресла́вный чудотво́рче.

Кондак 13

О святы́й уго́дниче Христо́в и чудотво́рче Иоа́нне Во́ине! Приими́ сие́ хвале́ние на́ше и мольбы́ тебе́ приноси́мыя, и благоприя́тными твои́ми к Бо́гу моли́твами изба́ви нас от вся́ких зол и обстоя́ний, боле́зней душе́вных и теле́сных, и от ве́чнаго муче́ния предста́тельством твои́м сохрани́ и досто́йны Ца́рствия Небе́снаго бы́ти умоли́, да сподо́бимся в Небе́сных селе́ниих воспева́ти Бо́гу: Аллилу́иа.

Этот кондак читается трижды, зате́м 1-й икос и 1-й кондак.

Моли́тва

О, му́чениче Христо́в, Иоа́нне во́ине! Хра́брый еси́ во бра́нех, и враго́м прогони́тель, и оби́димым засту́пник, всем правосла́вным христиа́ном. О, вели́кий засту́пниче и уго́дниче Христо́в, Иоа́нне во́инственниче! Поми́луй нас, гре́шных и недосто́йных, и заступи́ в беда́х и в ско́рбех, и в печа́лех, и во вся́кой злой напа́сти, и от вся́каго зла́го и оби́дящаго челове́ка, тебе́ бо дана́ бысть такова́я благода́ть от Бо́га, е́же моли́тися за ны, гре́шныя, в беда́х и напа́стех зле стра́ждущия. Изба́ви у́бо нас от оби́дящих и ненави́дящих, бу́ди нам побо́рник кре́пок на вся ви́димыя и неви́димыя враги́ на́ша. О, вели́кий побо́рниче, Иоа́нне во́ине! Не забу́ди нас, всегда́ моля́щихся тебе́, прося́щих по́мощи и неоску́дныя ми́лости твоея́, и сподо́би нас, гре́шных и недосто́йных, получи́ти от Бо́га неизрече́нная блага́я, я́же угото́ва лю́бящим Его́. Я́ко подоба́ет Ему́ всякая сла́ва, честь и поклоне́ние, Отцу́ и Сы́ну и Свято́му Ду́ху, ны́не и при́сно и во ве́ки веко́в. Ами́нь.

Святой Иоанн Воинственник жил в IV веке. Церковь Христова особо почитает его как великого помощника в скорбях. По молитвам святого получают утешение обиженные и скорбящие.

——————————————————————

Общее начало и конец всем канонам →
Порядок чтения по уставу
——————————————————————

Тропарь, глас 4-й

Воинством истинным страстотерпче, Небеснаго Царя воевода преудобрен бысть Иоанне. Оружием бо веры ополчився мудре, и потребил еси бесовския полки, победоносец явися и страдалец, образ в себе чудотворения нося. В напастех страждущих заступая, и от лютых бед изимая, тем же тя верою присно ублажаем, (дважды).

Слава, и ныне. Богородичен. Иже от века утаенное и Ангелом несведомое таинство, Тобою Богородице земным явися Бог, в неразмесне снятии воплощаемь. И Крест волею нас ради восприим. Им же воскресив первозданнаго, и спасе от смерти душа наша.

Канон, глас 2-й

Песнь 1. Ирмос

Грядите людие поем песнь Христу Богу, раздельшему море, и проведшу люди яже испусти из работы египетския, яко прославися.

Запев: Святыи праведныи Иоанне Воинственниче, моли Бога о нас (поклон).

Подвигом добрым подвизався по Христе Бозе, всеблаженне Иоанне, и от законопреступнаго мучителя мученики Господни сохраняя, сего ради от Господа венец прият нетленныи, Свету великому предстоиши, и нас просвети твоим ходатайством.

Запев. Светлое твое празднество днесь праведныи воине Иоанне созывает нас радостно на духовную трапезу, ты бо печальным утешитель бысть, иже верою к тебе приходящим.

Слава. Воинство земнаго царя не брегл еси, Христа ради, и богатство тленное нищим расточил еси. Сего ради и чудес даром обогатися, лукавыя обличая человеки, благочестивым же способствуя молитвами си.

И ныне. Богородичен. Воплотися от Тебе боголепно, Слово безплотное, премножеством человеколюбия Пречистая, к страстем приближися, и безстрастие человеком источи, преславныи Господь яко прославися.

Катавасия: Избави от бед рабы своя, святыи праведныи Иоанне Воинственниче, яко вси по Бозе к тебе прибегаем, ты бо молиши о нас Христа Бога нашего (поклон). Господи помилуй (трижды с поклонами).

Песнь 3. Ирмос

На камени мя веры утверди, разшири уста моя на враги моя, возвеселибося дух мой воспевати, несть свята якоже Бог наш, и несть праведна паче Тебе Господи.

Запев. С мученики несуменну веру стяжав, ко Христу всеблаженне Иоанне воинниче, и добродетельми обогатися, творящим память твою, благое днесь прошение подаждь нам.

Запев. Бежавшим лукавым рабом, невидим гонитель явися, воинственниче Иоанне всечестне, от Бога область приим, верным во Христа человеком прошения исполняя и душам спасения прося.

Слава. Яко же столп неподвижим свое сердце имея мудре Иоанне, любовь к мучеником Христовым стяжал еси, не убоявся законопреступнаго царя повеления: подаждь и нам любовь божественую стяжати, и грехом прощение получити.

И ныне. Богородичен. Воплощеися от кровей Твоих, хотением си Владычице, Пречистыи Господь наш Исус Христос, спасает мученики и отцы преподобныя, и человек множество, иже к Тебе притекающих. Катавасия.

Седален, глас 8-й. Царю веком угождая, законопреступнику Иулияну вся советы отразил еси славне, идолом жертвы возбраняя творити, мученики Христовы сохраняя, вместо мучительства повелевая им угонзнути на время. Сам же пожив богоугодно с миром душу Господеви предаде Иоанне, моли Христа Бога, согрешением разрешение даровати, чтущим святую память твою.

Слава, и ныне. Богородичен. Солнца мысленаго облаче, божественаго света светильниче златокованныи, нескверная, неблазная всенепорочная Владычице, омраченую душу мою слепотою страстей, безстрастия озари зарею молюся, и оскверненое омый сердце мое, токи умиления, и покаяния слезами от тимений мя очисти дел моих: да любовию зову Ти, Богородице присно Дево, моли Христа Бога, согрешением оставление даровати ми, Тебе бо имею надежду раб Твой.

Песнь 4. Ирмос

Пришествовав от Девы не ходатай, ни Ангел, но Ты Сам Господи воплощься, и спасе всего мя человека. Тем вопию Ти, слава силе Твоей.

Запев. Уподобися распятому волею на древе Христу Богу нашему, и Ему сраспятся всяцем воздержанием, милостынею и молитвою, и всякими добродетельми.

Запев. Смирив себе даже до смерти, идеже бо страннии погребение имеяху, твоя мощи блаженне погребены быша. Но явлением жене некоей верней, Бог прослави чудеса твоя.

Слава. Царю преступнику Иулияну в воинстве служа тленнем, и от него посылаемь на убиение мучеников Христовых. Ты же тех святе сохраняя, и в вере укрепляя пети, слава силе Твоей Господи.

И ныне. Богородичен. Недоумение предлежит ми от обышедших мя зол Пречистая. Но избави мя от них скоро, к Тебе бо единой прибегох. Катавасия.

Песнь 5. Ирмос

Света подателю и веком Творче Господи, во свете Твоих повелении настави нас, разве бо Тебе иного бога не знаем.

Запев. Яко дерзновение имея к Богу Иоанне, воин ныне Небесному Царю сыи. Проси нам грехов оставления, празднующим память твою.

Запев. Воинство земное не брегл еси, иногда Христа ради тело свое удручая, постом и молитвою, и враги до конца посрамил еси. Сего ради и чудесы от Бога обогатился еси.

Слава. Ни во что же вменил еси славу мира сего, славы ради Христа Бога нашего, именование стяжав по житию си блаженному: тайная яве обличати, и по смерти дарования сподобися.

И ныне. Богородичен. Марие Богородице безневестная, надежда верным, вражия возношения уничижи, а поющия Тя возвесели. Катавасия.

Песнь 6. Ирмос

В бездне греховней одержим, неизследную милосердия Твоего призываю бездну, от тли Боже мя возведи.

Запев. Небеснаго ради радования, и будущаго праведным веселия, земная вся оставил еси мудрования, и всячески добродетельми Богу угождая, за ны молися Иоанне всечестне.

Запев. Молитвами и постом, воздержанием же всяцем и целомудрием вооружив себе Иоанне, и венцем Царствия от Господа венчася, Его же угодник явился еси.

Слава. Прошения просящим верою, подаваеши блаженне Иоанне, иже правою верою тебе почитающим, крадущих чужая обличая, и злых человек, молитвами си всечестне.

И ныне. Богородичен. Слово Божие в Тя вселися Богородице, человеком Тя показа небесную лествицу, Тобою бо к нам Вышнии сшел есть. Катавасия.

Слава, и ныне. Кондак, глас 2-й. Мужеством души верою вооружився, глагол Божии, яко копие взем врага уязвил еси, мучеником похвала и удобрение великии Иоанне.

Икос. Кто подвиги твоя довлеет изглаголати, прехвальне воинственниче Иоанне, и болезни твоя, яже мужески о страждущих за веру Христову понесл еси, и дарования их же праведнаго ради жития твоего восприял еси. Не довлеют уста человеческая исповедати: премудростию убо украшен и мужеством, богатство возненавидел еси, и славу временную, воин явился еси Царя Небеснаго, Ему же присно молися о всех нас.

Песнь 7. Ирмос

О теле злате на поли Деире служимем, трие отроцы нерадиша о безбожнем велении. Но посреди пламени ввержени прохлаждаеми пояху, благословен Бог отец наших.

Запев. Царю царьствующим и Господу господьствующим воин изряден показася, и с праведными венцем венчася нетленным, от руки Вседержителя Господа.

Запев. Дерзновение имея к своему Владыце, о нас молитву сотвори Иоанне, и прошения наша исполни, и грехов прощения испроси нам молитвами си.

Слава. Мученическое дерзновение восприим, потщался еси по вере Христове поборати, якоже добрыи воин, вооружи себе силою Креста Господня, от него же даром чудес обогатися.

И ныне. Богородичен. Премудрости исполни и силы божественыя, и мудрости вышния Богородице, зовущих Сыну Твоему, благословен Бог отец наших. Катавасия.

Песнь 8. Ирмос

Пещь огнена иногда в Вавилоне действа разделяше, Божиим велением, халдеи опаляющи, верныя же орошающи поюща, благословите вся дела Господня Господа.

Запев. Вышняя взыскал еси, с мученики Христовыми в любви духовней соединися, с ними же и венец прият от Христа Бога, благая прошения подавая поющим, и превозносящим Христа во веки.

Запев. Неоскудно требования подавая, и иже в житии печальным утешитель, и нищим готовыи питатель был еси. И ныне молитву сотворяй о нас ко Господу, Его же превозносим во веки.

Слава. Моления наша приими, ныне приносимыя тебе праведному страстотерпцу. Тебе бо даде Господь чудесем дарование, подаяти просящим верно прошения, и превозносящим Христа во веки.

И ныне. Богородичен. Буди ми помощница и стена Богородице присно Дево рабу Твоему, и не остави мене лишена быти Твоего Владычества, да Тя превозносим во веки. Катавасия.

Песнь 9. Ирмос

Безначална Родителя Сын Бог и Господь, воплощься от Девицы нам явися, омраченныя просветити, и собрати расточенныя. Тем всехвальную Богородицу величаем.

Запев с поклоном. Не убоявся законопреступнаго царя повеления, вместо мук християны заступаше, и сокрывахуся Твоим повелением. И сего ради воин бысть Царю силам.

Запев. Велию веру стяжал еси ко Христу Богу, велики же и дары чудес божественых приял еси от Него, и от действия их проявился еси. И ныне творящих твое празднество и память, молися Господеви избавити от всякия нужды и печали.

Слава. Аще и на земли воинство оставив, но Небесному Царю воин наречеся Христов, лукавых уходы вспять возвращая, и верным прося грехов прощения. Тем же Иоанне блаженне, тя воспевающе Христа величаем.

И ныне. Богородичен. Многое дерзновение имущи Дево Богородице, к воплощенному из Тебе, молися, подати ми соблазном всяким разрешение, молитвами Твоими ко Христу пречистая Владычице. Катавасия.

Задостойник: Владычице приими молитву раб Своих, и избави нас от всякия нужды и печали. Ты еси Богородице, оружие наше и стена. Ты еси заступнице, и к Тебе прибегаем, Тя и ныне на молитву призываем, да избавиши ны от враг наших. Возвеличим Тя вси пренепорочную Матерь Христа Бога нашего, Юже осени Дух Пресвятыи.

Отпуст: Господи Исусе Христе Сыне Божии, молитв ради пречистыя Твоея Матере, и святаго праведнаго Иоанна Воинственника, и всех ради святых, помилуй и спаси нас, яко Благ и Человеколюбец. Аминь.

Добавить комментарий

Закрыть меню